KA'ABTULLAH KI TAMEER

BINAA’ UL KA’BAH
Jaisa ke pehle Arz kiya gaya ke Bani Jurham us waqt Makkah Muazzama me aakar aabad hue the, jab Hazrat Ismail alaihis salam aur unki Waledah ko Hazrat Ibrahim alaihis salam Sunsaan Chatyal maidan me Chord kar chale gaye the jab Hazrat Ismail alaihis salam bade hue to dono Baap beton ne mil kar Ka’bah shareef banaya, Allah Ta’ala ne Hawaa bhej di jisne Ka’bah Shareef ki Bunyaden Zaahir karden jo Toofaan e Nooh me dab gayin thiin aur wahan ek telaa ban gaya tha.
Phir Quraish e Makkah ke daur me Ka’bah Shareef ki Deewaren Munhadim hogayin to Quraish e Makkah ne phir se banane ka Irada kiya. Aapas me kehne lagey ke ye ALLAH ka ghar hai isme Sirf HALAAL maal lagaya jaye koi paisa Sood ka ya Gunah se Haasil kiya hua ya Zulman kisi se liya hua Maal uski tamer me na lagaya jaye. Jab maal jama’ kiya to Halaal maal itna jamaa na kar sakey jisse poora Ka’bah Shareef bana lete lihaza unho ne Ka’bah Shareef ka ek hissa Chord diya yani Imarat me na liya jise HATEEM kaha jata hai. Tamer e Ka’bah ke liye Jab Pathar utha utha kar laye ja rahe the to us Amal me Rasoolullah sallallahu alaihi wasallam bhi apne Chacha ABBAS BIN ABDUL MUTTALIB ke sath shareek the, us waqt Ap ke Kandhon par koi kapda nahi tha khaal chilne ka andesha tha. Hazrat Abbas razi Allahu anhu ne kaha ke ye jo tumhara Teh Band hai usey Kaandhe par rakhlo taake Muntaqil karne me aasani ho, AP sallallahu alaihi wasallam ne Apna Teh Band kaandhe par rakh liya to Sharam ke maare behosh hokar gir pade aur Aankhen oopar ko uthi hui rehgayin. Ap sallallahu alaihi wasallam ne Chacha se kaha ke laao mera Teh Band kahan hai Chunanche Ap sallallahu alaihi wasallam ne TehBand baandh liya us ke baad kabhi bhi Baghair TehBand nahi dekha gaya.(SAHEEH BUKHARI SAFHA 215,540)
Hamara Shaikh Hazrat Maulana Zakarya Sahib rahmatullahi alaih ne iski ek Hikmat bayan farmayi aur wo ye ke Allah Ta’ala ne Haazireen ko Ap sallallahu alaihi wasallam ka poora Jism dikha diya taake (nabuwwat se sarfaraz hone ke baad) Aeteraz karne wale Dushman yun na kahen ke Jismani taur par Apke andar koi aib hai jaise ke Bani Israil ne Hazrat Moosa alaihis salam ke bare me kaha tha ke Ye Nange hokar sab ke samne Ghusl is liye nahi karte ke inke Jism me Aib ki cheez hai Allah Ta’la ne pathar ko Hukum diya to wo unke kapde lekar bhaag gaya, wo uske peeche daude to sab ne dekh liya ke Jismani taur par bhi unke andar koi Aib nahi hai isko Suratul Ahzaab ki ayat 69 me bayan farmaya hai, Hazrat Moosa alaihis salam ka marz jismani se Mubarra hona Bani Israil ke aetraz ke baad zaahir kiya gaya aur Hazrat Khatimul Mursaleen Ashraful Ambiya sallallahu alaihi wasallam ki Bara’t Anil Aib Fil Jisme Nabuwwat ke sarfaraz hone se pehle hi naazireen ko maloom hogayi. WALLAHU ALEEMUN HAKEEM
Maal Jama karne ke baad Quraish ne Ka’abah Shareef ki tamer shuru kardi aur jab Imarat itni oonchi hogaya ke HAJR E ASWAD ko uski Jagah rakha jasake to aapas me is baat par Jhagadne lage ke HAJR E ASWAD ko uski jagah par Kaun rakhe. Har Qabeelah Khahishmand tha ke hamara aadmi is Khidmat ko Anjaam de jab Jidaal aur Khisaam ne Tool pakad liya to Masjid me jama hue aur bahmi mashwara se ye tai paya ke Kal jo shakhs sabse pehle Masjid me daakhil ho wo jo faisla kare usko tasleem kar liya jaye. Jab kal ka din aaya to Rasoolullah sallallahu alaihi wasallam sab se pehle Masjid me daakhil hue jab ap sallallahu alaihi wasallam ko dekhta to kehne lagey هذا الامين رضيناه(ye shakhs Ameen hai Hum iske Faisle par raazi hain) jab Ap sallallahu alaihi wasallam Masjid me andar tashreef  laye to Ap sallallahu alaihi wasallam ko bataya ke Hamara ye Jhagda hai aur Hum apke faisle par Raazi hain. Ap sallallahu alaihi wasallam nefarmaya ke Ek Kapda laao Ap sallallahu alaihi wasallam ne Kapda bicha kar Hajr e Aswad ko uske beech me rakh diya aur farmaya ke Har Qabeele ke afraad iske ek ek goshey ko pakad len aur sab iko utha kar Hajr e Aswad ki jagah par le jayen. Chunanche sab ne aisa hi kiya jab wahan pohanch gaye to Ap sallallahu alaihi wasallam ne Apne Dast e Mubarak se utha kar uski jagah Diwaar me rakh diya iske baad Ka’bah Shareef ki mazeed tameer shuru kardi. Us waqt Ap sallallahu alaihi wasallam ki Umar 35 saal thi.
(Seerat Ibne Hisham ma’aa Alrauz al anf safha 127-132)
Hazrat Ayesha razi Allahu anha ne bayan kiya hai ke Rasoolullah sallallahu alaihi wasallam  ne Mujh se Khitab hokar farmaya ke Teri Qaum ne Jab Ka’abah ko banaya to IBRAHIM alaihis salaam ki poori Bunyaad par banane se Qaasir reh gaye(aur HATEEM ko Ka’abah Shareef ki Imarat me Shamil nahi kiya) Maine Arz kiya Ya Rasoolallah sallallahu alaihi wasallam Ap isko poori bunyaadon par dubaraha kyu nahi banadete. Ap sallallahu alaihi wasallam ne farmaya agar ye baat  na hoti ke Teri Qaum( Quraish) ke log naye naye Musalman hue hain to Mai phir se tamer kardeta aur Ibrahim alaihis salam ki bunyadon par poora kardeta (chaunke ye log naye naye Musalman hue the isliye andesha hai ke Ka’abah Shareef ko agar Munhadim kar ke dubara phir se banaya jaye aur Hateem ko daakhil kardiya jaye to ye log yun kahenge ke is Nabi (sallallahu alaihi wasallam )ne Ka’abah ko giradiya aur usko badal diye. Is liye Mai aisa nahi karta.
Hazrat Abdullah bin Omer razi Allahu anhuma ne Hazrat Ayesha razi Allahu anha ki is hadees se ek Fiqhi Masla Mustambat kiya hai wo farmate the ke Chaunke Ka’abah Shareef ke andar ke dono goshey (jo hateem me hain) haqeeqi goshe nahi hain asli Imarat ke darmiyan hain (poori Imarat me Hateem Shamil karlena tha) is liye Rasoolullah sallallahu alaihi wasallam ne in dono Goshon ka Istilaam nahi kiya.
(Saheeh Bukhari safha 215, 477)
Hazrat Ayesha razi Allahu anha ki riwayat kardah Hadees unke Bhanjey Hazrat Abdullah Bin Zubair Razi Allahu anhuma ko maloom hui to unho ne Zamana e Khilafat me Ka’abah Shareef ko Hazrat Ibrahim alaihis salam ki Bunyaadon par bana diya, Phir Hajjaj Bin Yousuf ne Hazrat Abdullah Bin Zubair Razi Allahu anhuma ko Qatal karwa diya to Ka’abah Shareef ko girakar phir se usi tareekhe par banadiya jaise Quraish ne banaya tha yani HATEEM ko Imarat se bahar nikal diya . chunanche Aj tak Ka’abah Shareef usi tarah bana hua hai, (Hateem Ta,eer e ka’abah se kharij hai) Lekin Ka’abah  Shareef ka Juz hai chat hone na hone ka Farq hai isme Musalmano ke lye Ye aasani hogaya ke Ka’abah Shareef ke chat wale Hisse me Daakhil hone ka mauqa na mile to Hateem me dakhil hojaye kyun ke Ka’abah Shareef ka Hissa hia albatta Namaz padhte waqt ye Khayal rakha jaye ke Imarat wale hisse ki taraf  rukh rakha jaye.
لانه أمر التوجه اليها في النص القران المتواتر و خبر سيدة عائشة رضي الله عنها خبر الواحد فيحتاط في التوجه القبلة ولا يقتصر علي التوجه الي الحطيم فقط
jazakALlah khair

Contd Insha Allah

 www.facebook.com/LifeOfMuhammad.S.A.W

KHUTBA E HAJJATUL WADAA'

KHAATIMUN NABIYYEN SALLALLAHU ALAIHI WASALLAM KA KHUTBA HAJJATUL WADAA’

        Huzoor sallallahu alaihi wasallam ne Allah Ta’ala ki Hamd o Sana aur Apni Nabuwwat aur Risalat ki Gawahi dene ke baad Taqwaa ikhtyar karne ki wasaiyyat farmayi aur Apni Rehlat ke Qurb ki taraf ishara farmate hue irshad farmaya

        1. “Logon ! Mai Khayal karta  hun ke Mai aur tum phir kabhi is Majlis me ikatthe nahi honge.

        Musalmano me bahmi Mohabbat aur Ulfat aur ek Doosre ki Izzat o Aabroo aur Jaan o Maal ki Hifazat ke bare me Takeed farmate hue irshad farmaya:

        2. Logo! Tumhare khoon , tumhare maal aur Tumhari Izzaten ek Doosre par aise hi Haraam hain jaisa ke tum Aj ke din ki, Is Shahar ki, is Mahine ki Hurmat karte ho. Logo! Tumhe Anqareeb Allah ke samne Haazir hona hai aur wo Tum se tumhare aamaal ki babat sawal farmayega. Khabardaar! Mere baad Gumrah na ban jana ke ek Doosre ki Gardanen kaatne lago.

        Rasoolullah sallallahu alaihi wasallam ne Silsilaye kalaam ko jaari rakhte hue tamam Jaahili Qawaneen aur Jahiliyat ke Iqtesadi Nizaam ko Khatm karne ka Aelaan in alfaaz me farmaya.

        3. Logo! Jaahiliyat ki Har ek Baat mai apne Qadmon ke neeche Paamaal karta hun. Jahiliyat ke Qatlon ke tamam Jhagde malyamet karta hun. Pehle Khoon jo mere Khandaan ka hai yani IBN E Rabee’a Bin Haris ka Khoon jo Bani Sa’ad me doodh peeta tha aur Huzail ne use mar dala tha mai Chordta hun . jahiliyat ke zamane ka Sood malyamet kar diya gaya. Pehle Sood apne Khandaan ka jo Mai mitata hun wo Abbas Bin Abdul Muttalib ka Sood hai wo Saare ka saara chord diya gaya.

        Aurton ke sath Bhalai aur Khoobi ka bartao karne aur Zulm o Ziyadti se rokte  hue irshad farmaya

        4. “Logo! Apni Biwiyon ke mutalliq Allah se darte raho. Khuda ke naam ki Zimmedari se tum ne Unko Biwi banaya aur Khuda ke kalaam se tumne Unka Jism apne liye Halal banaya hai. Tumhara Haq Aurton par itna hai ke wo Tumhare Bistar par kisi Ghair ko (ke uska aana tumko nagawaar hai) na aane  den. Lekin agar wo aisa karen to unko aisi maar maro jo namoodar na ho. Aurton  ka haq tum par ye hai ke tum unko achi tarah khilaao ,achi tarah pehnao.

        Quran e Majeed ko Sarchashma e Hidayat qarar dete hue aur apni Ummat ko Sirf Allah Ta’ala ki Ibadat , Namaz ki pabandi, Zakat aur Fareeza e haj ki adaaigi aur Auliya e Umoor o Hukkaam ki Ita’at ka hokum dete hue farmaya:

        5. “Logo ! Mai  tum me wo cheez Chord chala hun ke agar use mazboot pakad loge to kabhi Gumrah na hoge wo Quran Allah ki Kitab hai.

6. “Logon! Na to mere baad koi paighambar hai aur na koi Jadeed(new) Ummat paida hone wali hia , Sun lo ke Apne parwardigar ki Ibadat karo aur panjgana Namaz ada karo. Saal bhar me ek mahine ke Roze rakho. Apne Maalon ki zakat nihayat dili Khushi ke sath diya karo. Khaana e Ka’bah ka Haj baja laao aur apne Auliya e Umoor o Hukkam ki ita’at karo jis ki Jaza ye hai ke Tum log ye baja laa kar parwardigar ke Firdaus e Barreen(Jannat) me daakhil hoge.”

        Aur Aakhir me Apni Ummat ko gawah banate hue irshad farmaya:

        7. “Logo! Qayamat ke Din tum se meri Babat bhi daryaft kiya jayega. Mujhe zara batado ke tum kya jawab doge.

        Sab ne kaha:

“Hum iski Shahadat dete hain ke Ap ne Allah ke ahkaam hum tak pohancha diye. Ap sallallahu alaihi wasallam ne Risalat o Nabuwwat ka Haq ada kar diya. Ap sallallahu alaihi wasallam ne Hum ko Khotey aur Khare ki babat achi tarah bata diya.(us waqt) Nabi sallallahu alaihi wasallam ne apni Ungusht e Shahadat ko uthaya.

Asmaan ki taraf Ungli uthate the aur phir logon ki taraf Jhukate the, (farmate the)

اللَّهُمَّ اشْهَدْ اللَّهُمَّ اشْهَدْ اللَّهُمَّ اشْهَدْ

Aye Allah! Sunle(tere bande kya keh rahe hain) Aye Allah gawah rehna ke (ye log kya keh rahe hain)

Aye Allah Shaahid reh ke (ye sab kaise saaf iqrar kar rahe hain).”

        8.“Dekho jo log maujood hain wo un logon ko jo Maujood nahi hain inki tableegh karte rahen mumkin hai ke Baaz Saamiyeen se wo Log Ziyada tar is kalaam ko yaad rakhen aur Hifazat karne wale hon jin pat Tableegh ki jaye.”

        ITMAAM E NEMAT KA AELAAN

Huzoor sallallahu alaihi wasallam ke Is Azeem Khutbe ko Sunne walon ki tadad ek laakh se ziada thi. Ap sallallahu alaihi wasallam ne Apni Oontni QASWAA’ par sawar hokar Mandirjeh Baala Khutba diya aur uske baad usi jagah ye Ayat e Mubarakah Naazil hui.

الْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِي وَرَضِيتُ لَكُمُ الْإِسْلَامَ دِينًا

(سورة المائدة آيت 3)

Tarjuma: Aj Maine tumhare deen ko Tumhare liye kaamil kardiya aur tum par apni Nemat ko poora kardiya aur maine Tumhare liye Islaam ko bataur e Deen pasand karliya."

(SEERAT SARWAR E KAUNAIN)

ALLAHU AKBAR!

MERE MUSALMAN BHAIYYON IN YE IJTMAI NASEEHATEN HAMARE PYARE NABI SALLALLAHU ALAIHI WASALLAM KI UMMAT KE NAAM AAKHRI NASEEHATEN HAIN.

IN GHAUR SE PADHO AUR IN PAR KUCH DER GHAUR KARO AUR APNI ZINDAGI ME LAANE KI KOSHISH KARO.

SEERAT KI KUTUB ME AUR TAFSEEL MILEGI WAHAN BHI PADHO YE AYYAAM E HAJ HAME PAIGHAAM DE RAHE HAIN KE HAJJATUL WADAA’ KI NASEEHATEN HUM APNI ZINDAGI ME LAAYEN.

AJ AHED KARLO KE MAI IN NASEEHATON PAR AMAL KARUNGA YE MERE PYARE NABI KI NASEEHATEN HAIN.

ALLAH TA’ALA HUM SAB KO IN PAR AMAL KARNE KI TAUFEEQ ATA FARMAYE AUR ZINDAGI SUNNAT KE MUTABIQ GUZARNE KI TAUFEEQ ATA FARMAYE.

AAMEEN YA RABBAL AALAMEEN.

HAJJATUL WADAA' ==>4

MAKKAH MUAZZAMA ME QIYAAM:

        Sa’ee se farigh hokar Huzoor sallallahu alaihi wasallam ne Ihraam nahi khola kyun ke Ap sallallahu alaihi wasallam ka Haj Qiraan tha Albatta Sahaba Ikraam razi Allahu anhum ko Halaq ya Qasar kara kar Ihraam kholne ka hokum farmaya aur farmaya ke agar Mujhe pehle se Who Baat maloom hoti jo Baad me maloom hui to mai Hadii sath na lata.(ZAADUL MUAAD 2/233)

        4 Zil Hijjah se 8 Zil Hijjah tak Ap sallallahu alaihi wasallam ne Makkah Muazzamah me hi Qiyaam farmaya aur usi Qiyaam ke Dauraan Ka’abah Shareef ke Darwaze par Khutbah bhi diya.

MAKKAH MUAZZAMAH SE MINAA KO RAWANGI:

        8 Zil Hijjah ki Subah ko Suraj buland hojane ke baad Huzoor sallallahu alaihi wasallam apne Sahaba razi Allahu anhum ke sath Minaa ki taraf rawana hue . mina me Ap sallallahu alaihi wasallam ne Zohar , Asar, Maghrib aur Ishaa ki Namazen ada farmayi aur Raat ko bhi wahin Qiyaam farmaya(ZAADUL  MU’AAD 2/233)

Riwaayaat se maloom hota hai ke Huzoor sallallahu alaihi wasallam ne Yaumu Tarweeha yani 8 Zil Hijjah ko ek Khutbah bhi diya jis me Logon ko Manasik e Haj ki taleem di(yani Haj ke masael aur uska tareekha)

(UYOONUL ASAR 2/362)

9 ZIL HIJJAH, WUQOOF E ARAFAT:

        9 Zil Hijjah ko Namaz e Fajr ada karne ke baad jab aftab tuloo’ hogaya to Ap sallallahu alaihi wasallam Arafaat ki taraf rawana hogaye . Hazraat e Sahaba Ikram razi Allahu anhum Talbiyah aur Takbeer padhte hue Sarwar e Kaunain sallallahu alaihi wasallam ke sath Maidan e Arafat me pohanche. Arafaat ke Mashriqi janib ek Maqaam tha jisko NIMRAH kehte the. Ap sallallahu alaihi wasallam ne Hukum  diya ke Mera Khaimah wahin nasab kiya jaye ( ab us maqaam  par badi Wasee’ o ‘Areez Masjid Masjid e Nimrah ke naam se Tameer kardi gayi hai jahan Imam e Haj Khutabh deta hai).

        Sooraj dhalne yani Namaz e Zohar ka waqt hone tak Ap sallallahu alaihi wasallam ne yahan Qiyaam farmaya uske baad Ap sallallahu alaihi wasallam apni Oontni par sawar hokar Batan e Waadi me tashreef laaye aur Jabl e Rahmta ke paas Oontni par baithe hue Khutbah irshad farmaya jo Tareekh e Islam me Khutbah Hajjatul wadaa’ ke naam se mashhoor hai.

HAJJATUL WADAA' ==> 3

SAFAA O MARWAH KI SA’EE:-

        Iske baad Huzoor sallallahu alaihi wasallam ne SAFAA ka Rukh farmaya aur Safaa pahadi ke paas pohanch kar ye Aayat e Mubarakah tilawat farmayi:

إِنَّ الصَّفَا وَالْمَرْوَةَ مِنْ شَعَائِرِ اللَّهِ (سورة البقرو 158)

Tarjumah: Beshak Safaa o Marwah Allah Ta’ala ke Shaa’er (yani Nishaniyon)  me se hain.

        Aur farmaya  ke Hum wahin se Ibteda karte hain Jahan se Allah Ta’ala ne Ibteda farmayi ( yani Ayat e Mubarakah me Pehle Safaa ka zikr hai phir Marwah ka is liye Hum Safaa se Sa’ee ki Ibteda karte hain).

Uske baad Huzoor Aqdas sallallahu alaihi wasallam SAFAA ki pahadi par Chadhe yahan tak ke Ka’bah Shareef Nazar aane laga. Ka’abah Shareef ki taraf rukh kar ke Allah Rabbul Izzat ki Hamd o Sanaa bayan farmayi aur Allahu Akbar kaha. Phir mandarjah zail kalimaat padhe:

لَا إِلَهَ إِلَّا اللَّهُ وَحْدَهُ لَا شَرِيكَ لَهُ، لَهُ الْمُلْكُ وَلَهُ الْحَمْدُ، وَهُوَ عَلَى كُلِّ شَيْءٍ قَدِيرٌ، لَا إِلَهَ إِلَّا اللَّهُ وَحْدَهُ، أَنْجَزَ وَعْدَهُ، وَنَصَرَ عَبْدَهُ، وَهَزَمَ الْأَحْزَابَ وَحْدَهُ

Tarjumah: Koi Mabood nahi Allah ke Siwaa, Who Ek hai uska koi Shareek nahi. Badshahat usi ki hai au Hamd ka Mustahiq bhi sirf wahi hai aur Wo har cheez par Qaadir hai , Allah ke Siwa koi Mabood nahi wo Ek hai usne Apna Wa’da poora farmaya aur Apne Bande ki madad farmayi aur (Kuffar ki) Jama’ton ko tanha usi ne Shikast di.”

3 baar ye Kalimaat padhe aur degar Duaen bhi padhen uske baad Sa’ee Shuru farmadi aur Safa se Marwah ki jaanib chale. Sabz(Green) Sutoonon(pillars) ke darmiyan tezi se guzre aur Baaqi Hisse me Aam chaal chale. Jab Marwah pahadi par pohanche to Ka’abah Shareef ki taraf rukh farma kar Takbeer kahi aur Allah Ta’ala ki badai aur Azmat bayan farmayi aur Safa ki tarah Marwah par bhi Duaen padhen. Phir Safaa ki taraf rawana hogaye aur isi tarah 7 Chakkar poore farmaye( Yani Safa se Marwah tak ek aur Marwah se Safa tak doosra) is tarah Marwah par saatwan(7^th) Chakkar Khatm hua.

(SEERAT E HALABIYAH 3/31, ZAADUL MU’AAD 2/227-228)

HAJJATUL WADAA' ==>2

MAKKAH MUAZZAM ME DAAKHILA:
Ahle Imaan ka ye Qaafila Imaamul Ambiyaa sallallahu alaihi wasallam ki Qiyaadat me Buland aawaz se Allah Ta’ala ki Tauheed aur Apni bandage ka Aelan karta hua Zul Hijjah ki 4 Tareekh ko Waadi e Zii Tuwaa me pohancha jo Makkah Muazzama se bilkul Qareeb hai. Uske baad Syyed e Aalam sallallahu alaihi wasallam ne Namaz e Fajr ada farmayi aur uske Baad Haram e Makkah me daakhile ke liye Ghusl farmaya aur Sanniyatul Ulyaa’ ki taraf se Makkah Muazzam me daakhi hue.(Sanniyatu ulyaa’ ko Ak ka muahdah kaha jata hai)
(HAJJATUL WADAA O UMRAATUN NABI 7/66)
MASJID E HARAAM ME DAAKHILA:
Chaasht ke waqt Nabi kareem sallallahu alaihi wasallam Masjid e Haraam me Baab Us Salaam se daakhil hue ( Us waqt usko Baab e Abd e Munaaf kaha jata tha). Jab Ap sallallahu alaihi wasallam ki Nazr e Mubarak Baitullah par padi to Ap sallallahu alaihi waslla;m ne ALLAHU AKBAR kaha aur yun Dua farmayi:
" اللهُمَّ أَنْتَ السَّلَامُ , وَمِنْكَ السَّلَامُ , فَحَيِّنَا رَبَّنَا بِالسَّلَامِ , اللهُمَّ زِدْ هَذَا الْبَيْتَ تَشْرِيفًا وَتَعْظِيمًا , وَمَهَابَةً , وَزِدْ مَنْ حَجَّهُ , أَوِ اعْتَمَرَهُ تَكْرِيمًا , وَتَشْرِيفًا , وَتَعْظِيمًا وَبِرًّا ".
Tarjuma:-  “Aye Allah Tu hi Salaamti Ka maalik hai aur teri hi jaanib se Salamti ataa hoti hia, Buss Aye Hamare Rabb! Tu hame Salamati ke sath Zinda rakh, Aye Allah ! Tu is Ghar (yani Kaabah Shareef) ki Tashreef o Ta’zeem o Takreem aur Haibat me izafa farma aur Jo Shakhs iski ta’zeem karte hue Haj ya Umrah kare usko bhi Azmat Buzrugi aur Sharafat ata farma.
(Baihaqi Sunanul Kubraa 7/158)
TAWAAF E KA’BAH
Huzoor sallallahu alaihi wasallam ne Masjid E Haraam me Daakhil hone ke baad Tawaaf kiya. Tahiyyatul Masjid ki 2 Rakaat nahi padhen kyu ke Masjid e Haraam Ka Tahiyya Tawaaf hai. Ap sallallahu alaihi wasallam ne Hajr e Aswad ke Maqaabil khade hokar uska Istislaam kiya, phir Tawaaf Shuru farma diya , Rukn e Yamani aur Hajr e Aswad ke darmiyan ye Dua padhi
رَبَّنَا آتِنَا فِي الدُّنْيَا حَسَنَةً وَفِي الْآخِرَةِ حَسَنَةً وَقِنَا عَذَابَ النَّارِ
(سورة البقرة 201)
Tarjuma: “Aye Hamre Rab ! Hame Dunya me Khair o Bhalai ataa kar aur Aakhirat me bhi Khair o Bhalai ataa kar aur Hame Dozakh ke Azaab se bachale.”
Tawaaf ke pehle 3 Chakkaron me RAMAL bhi farmaya jiske mainey hain Chotey Chotey Qadam uthana aur Kaandhon ko Pahelwano ke andaz me Harkat dena. Neez Ap sallallahu alaihi wasallam IZtebaa’ bhi kiya jiske Mainey hain ke Dayen (right) Kandhe ko Khula rakhna aur Ahraam ki oper wali Chadar ko Baghal ke Neeche se Guzaar kar Baayne Kandhe par Daal dena. Huzoor sallallahu alaihi wasallam ne Rukn e Yamani ko Bosa nahi diya ( Rukn e Yamani ko Hath lagana Masnoon hai lekin Uska Bosa lena Sabit nahi hai)
Jab Ap sallallahu alaihi wasallam Hajr e Aswad par pohanche to Izdehaam ki wajeh se uski taraf Hathon se Ishara kar ke unko Choom lete ya Chadii se Ishara farmate. Isi tarah Ap sallallahu alaihi wasallam ne 7 Chakkar poore farmaye.
(ZAADUL MUAAD 2/225)
DUGANA TAWAAF KI ADAAIGI:
Tawaaf se farigh hokar Ap sallallahu alaihi wasallam Maqaam e Ibrahim par aye aur uske samne Qibla Rukh khade hogaye yani Maqaam e Ibrahim Ap sallallahu alaihi wasallam ke aur Ka’bah ke darmiyan aagaya. Is mauqe par Huzoor sallallahu alaihi wasallam me ye Ayat Tilawat farmayi:
وَاتَّخِذُوا مِنْ مَقَامِ إِبْرَاهِيمَ مُصَلًّى
(سورة البقرة 125)
Tarjuma: “ (aur Hum ne Hukum diya ke) Maqaam e Ibrahim ko Musalla bana lo(yani wahan Namaz padho).
Ap sallallahu alaihi wasallam ne 2 Rakat Tahiyyatut Tawaaf ada farmayin (jo har tawaaf ke baa dada karna wajib hai)
(ZAADUL MUAAD 2/225-227)
www.facebook.com/LifeOfMuhammad.S.A.W

The deaths of Aminah and Abdul Muttalib

The deaths of Aminah and 'Abdu’l-Muttalib:

When the Messenger of Allah was six years old, his mother, Aminah, died: She had taken him to Yathrib to visit relatives and on the journey back her death occurred at al-Abwa' between Makkah and Madinah.  Muhammad (peace and blessings be upon him) must have felt very lonely at this time but he went to stay with his grandfather who was extremely kind to him. He would sit Muhammad (peace and blessings be upon him) on his favourite seat in the shade of the Ka'bah and affectionately caress him.

When the Messenger of Allah (may Allah bless him grant him peace) was eight Abdu'l-Muttalib also died.

His uncle, Abu Talib:

The Messenger of Allah then went to live with his uncle, Abu Talib, the full brother of his father, Abdullah. Adu'l-Muttalib had told Abu Talib to take good care of the boy so he was always protective towards him. He treated him with more kindness than he showed to his own sons, Ali, Jafar and 'Aqil.

HAJJATUL WADA'AA ==>1

BISMILLAHIR RAHMANIR RAHEEM

NAHMADUHU WA NUSALLAI ALAA RASOOLIL KAREEM

HAJJATUL WADAA’ 10 HIJRI

Haj ki Farziyat kis saal hui ? Isme Mukhtalif Aqwaal hain. Imam Azam Abu Haneefah rahmatullahi alaih ne  10 Hijri me haj ki Farziyat wale Qaul ko Tarjeeh di hai ke Agar isse Qabl farz hota to Huzoor sallallahu alaihi wasallam uski adaaigi me Taakheer na farmate. Imam Ibne Qayyim rah ne isi Qaul ko tarjeeh di hai.(ZAADUL MUAAD 3/595)

Haj Par Rawangi Ke Liye Aelaan E Aam:-

          Huzoor sallallahu alaihi wasallam ne 10 Hijri me Safar e Haj ka irada farmaya aur aam Aelaan kara diya. Madine ke Atraaf se bhi Jaanisaron ke aafile Ap sallallahu alaihi wasallam ki Rifaqt me Haj karne ke liye Madina Tayyibah pohancha gaye. Unki Ta’dad bhot Ziada thi. Huzoor sallallahu alaihi wasallam ne Rawangi se Qabl Madina Tayyiba ke intezaami Umoor Hazrat Abu Dujana Saa’adi razi Allahu anhu ko Qayem Maqaam muqarrar farmaya. Ek riwayat me Hazrat Sibaa’ Bin ‘Urfatah razi Allahu anhu ka naam aaya hai.(Seerat Ibne Hisham 4/23)

Madine Tayyibah se Rawangi:-

          25 Zil Qaedah 10 Hijri ko Huzoor sallallahu alaihi wasallam Madine Tayyibah se HAJ ke safar par rawana hue. Hazrat Ibne Abbas Razi Allahu anhuma farmate hain ke Jab Ap sallallahu alaihi wasallam rawana hue to Zii Qaedah ke 5 Din Baaqi the.(Bukhari Shareef)

          Huzoor sallallahu alaihi wasallam ne Namaz e Zohr ki 4 Rak’aat Madine Tayyibah me ada farmayi. Phir Ap sallallahu alaihi wasallam ne baalonko sanwara, tel lagaya.

Zul Hulaifah  me Qiyaam :-

          Zohar o Asar ke darmiyan Ap sallallahu alaihi wasallam Madine Tayyibah se rawana hue . Zul Hulaifah (jisko Abyaar e A’alaa kaha jata hai) pohanch kar Namaz e Asar Qasran yani 2 Rak’aat ada farmayi. Phir wahin Qiyaam farmaya aur raat ko bhi wahin muqeem rahe(Bukhari Shareef 1/190, Zaadul Muaad 2/106)

          Ap sallallahu alaihi wasallam ne Maghrib aur Ishaa aur agle din ki Fajar o Zohar ki namazen bhi Zul Hulaifah me hi ada farmayin is safar me tamam Azwaaj e Mutahahraat razi Allahu anhunna bhi Ap sallallahu alaihi wasallam ke sath thin.

Ahraam ke liye Ghusl :-

          Jame’ Tirmizi me hai ke Jab Ap sallallahu alaihi wasallam ne Ahraam baandhne ka iradah farmaya to GHUSL kiya.(Tirmizi Baab Maa Jaa’aa fi ightisaali indal Ihraam) Jab Ap sallallahu alaihi wasallam ne GHUSL farma liya to Hazrat Ayesha razi Allahu anha ne Ap sallallahu alaihi wasallam ke Jism Mubarak aur Sar par KHUSHBOO lagayi jiska Asar Ap sallallahu alaihi wasallam ke Sar ke Baalon aur Dadhi Mubarak par nazar aaraha tha, ye Khushboo MUSHK aur Zareerah thi.(MUSLIM, BAIHAQI)

QURABANI KE JANWARON PAR ALAMAT LAGANA:-

          Is ke baad Huzoor sallallahu alaihi wasallam ne HADII ke Janwaron ke gallon me Qalladey dale, Oonton ki Kohanon ko daayen jaanib se zarasa Shaq kar ke jo Khoon nikla wahin mal diya jisko ASH’AAR kehte hain yani is baat ki alamat ke ye Qurbani ke janwar hain.(Saheeh Muslim baab Taqleedul hadii wa Ash’aarihi Indal Ihraam)

AHRAAM AUR TALBIYAH:-

          Uske baad Huzoor sallallahu alaihi wasallam ne 2Rak’aat Ahraam ke nafil ada farmaye.(ZARQANI 145/8)

Uske baad Ap apni sawari par baithe aur Qible ki taraf rukh kar ke TALBIYAH padha jiske alfaz mandarjah zail hain:

لبيك اللهم لبيك، لبيك لا شريك لك لبيك، اِن الحمد والنعمة لك والملك لا شريك لك

LABBAIK ALLAHUMMA LABBAIK , LABBAIK LAA SHAREEKA LAKA LABBAIK , INNAL HAMDA WAN NI’MATA LAKA WAL MULKA LAA SHAREEKA LAK.

(BUKHARI O NASAI BAAB KAIFIYATUT TALBIYAH)

Tarjuma:-

Mai Haazir hun Aye Allah ! Mai Haazir hun, tera koi Shareek nahi mai Teri baargah me Haazir hun, Beshak Tamam tareefen tere hi liye hain , Nemat aur badshahat bhi Teri hai Tera koi Shareek nahi.

        Zara TALBIYAH ke Alfaaz o Ma’aani par ghaur karen to maloom hota hia ke Insan TAUHEED ke Samundar me Ghauta laga raha hai. Ap sallallahu alaihi wasallam ne Buland Awaaz se TALBIYAH padha aur Sahaba razi Allahu anhum ko bhi yahi Hukum farmaya ke Talbiyah Oonchi Awaaz se padhen. Huzoor Aqdas sallallahu alaihi wasallam ne Ahraam ke Nafil  ke Baad TALBIYAH padha. Phir sawari par Baith kar bhi Talbiyah padha. Phir jab Ap sallallahu alaihi wasallam rawana hue aur Maqaam BAIDAA’ par pohanche to Ap sallallahu alaihi wasallam ne TALBIYAH padha. Riwayat karne wale Sahaba me se jisne Jis waqt Ap sallallahu alaihi wasallam ki Zubaan Mubarak se Talbiyah Shuna usko naqal kardiya. Ahle Ilm ne ye Tafseel likhi hai.

(contd Insha Allah)